Бирги президент-биле байырлажыышкын: Чоннуң чоон оруу-биле<p>Экии, хүндүлүг чаңгыс чер-чурттугларывыс
Бирги президент-биле байырлажыышкын: Чоннуң чоон оруу-биле
Экии, хүндүлүг чаңгыс чер-чурттугларывыс!
Республикавыстың баштайгы президентизи өндүр чаңгыс чер-чурттуувус Шериг-оол Дизижикович Ооржак-биле кады чурук, олар чок апаарга меңээ оон-даа үнелиг болу берген. Өгбевис-биле ужуражылгавыс онзагай уткалыг болган - Тываның эрткен, амгы болгаш келир үезиниң дугайында чугаалашкан бис. Өгбевистисөөлгү оруунче үдеп тура силерниң-биле бистиң шуптувустуң чүректеривисте синген чугула бодалдарны үлежиксеп тур мен.
Барыын-Хемчик кожуун болгаш бүгү Тыва чонунуң алыс оглу, бодунуң чер-чуртунга кызыгаар чок бараан болуп, чонунга ынакшылдың көскү үлегер-чижээ чораан кижи-биле байырлажып турар.
Ол 1942 чылда Тыва Арат Республикага, Шекпээрге төрүттүнген. Күш-ажылчы оруун чазаныкчылап эгелээн бөдүүн оол бүдүн республиканың удуртукчузу чедир улуг орукту эрткен. Олар бистиң төөгүвүстүң нарын үезинде-«дүшкүүрлүг» 90 чылдарда Тываны удуртуп турда, чогум-на ооң мерген угааны, аажы-чаңының быжыы болгаш тура-соруу бистиң республикага ынчан тайбыңны болгаш турум чорукту кадагалап арттырып берген. Олар бүгү чуртталгазын төрээн Тывазы улам сайзыраарынга тураскааткан.
Бөгүн бистиң чүректеривис ажыг-шүжүгге долузу-биле бүргедип албазын күзээр-дир мен. Шериг-оол Дизижикович дыка бедик, айдың амыдыралды чурттап эрткен. Олар республикавыс улаштыр сайзыраар кылдыр бүгү-ле күжүн берген. Оларның ажыл — херээн уламчылаары бистиң хүлээлгевис-тир. Бистиң кожуунувусту база республикавысты адаларывыстан канчаар хүлээп алган-дыр бис,оон-даа эки байдалга дараазында салгалдарга арттырар дээш күжүвүстү бээрин богүн даңгыраглаалыңар.
Чаңгыс чер-чурттуглар, өгбевис, удуртукчувус-биле чогуур деңнелде байырлажыылыңар. Барыын-Хемчик кожууннуң Болгаш Ак-Довурак хоорайның шупту чурттакчыларын апрель 15-те Кызыл-Мажалык суурнуң культура Ордузунга 12:00 эгелээр чарлыышкын езулалынче чалап тур мен. 12:00 Кызыл-Мажалыктын Буян-Бадыргы кудумчузундан Ордуга чедир дириг коридорну организациялар, чон тургузар.
Ёзулал сарыг шажын дүрүмнери-биле эртер. Дээди хүндүткелдиң болгаш буян-сеткилдиң демдээ кылдыр ак кадактарны ап болур: бистиң ниити чырык сактыышкынывыстың болгаш өөрүп четтириишкинивистиң демдээ болзун.
Кожуунувустуң чурттакчы бүрүзүнге кыйгырыым: Бо кажыыдалдыг хүннерде бот-боттарывыска улам кичээнгейлиг болуп, энерел сеткилди хөйү-биле көргүзээлиңер. Ада-иеңерже долгап, кожаңарны деткип, кээргенчиг кижилеривиске дузалажыылыңар. Бистиң өндүр чаңгыс чер-чурттуувустуң өлүмү -бо өртемчейде чуртталганың кайы хире хээрек болганы база бот-боттарывыска кам-хумагалыг болурувустуң кайы хире чугулазының сагындырыы.
Кожуунувус аныяктарынга. Шериг-оол Дизижиковичиниң амыдырал-чуртталгазының оруун көрүңер даан. Ол дээрге чүден-даа кортпас, каалама эвес оруун эрткен кижиниң оруу-дур. Арын-нүүрүңер-биле чурттаңар, күш-ажылыңар-биле сорулгаларны чедип ап чоруңар, харыысалгадан кортпаңар. Чогум-на силер бистиң республиканың келир үезин тудар салгалывыс силер, кожуун, республика тургузукчуларының чырык адынга төлептиг болур-даа силер.
Бирги президент-биле байырлажып турзувусса-даа ооң чырык овур-хевири, чагыглары бистиң-биле кезээ мөңгеде артар. Өндүр өгбевиске черге чедир мөгейдивис. Төөгүнүң база бир улуг арны болур бо байырлажыышкын езулалынче шуптуңарны чаладым.
Кожууннун чагырга даргазы
Мерген Хомушку
Теги: бирги, президентбиле, байырлажыышкын, чоннуң, чоон, оруубиле, экии, хүндүлүг, чаңгыс, черчурттугларывыс, республикавыстың, баштайгы, президентизи, өндүр, черчурттуувус, шеригоол, дизижикович, ооржакбиле, кады, чурук, олар, чок, апаарга, меңээ, оондаа, үне