Чаа 2026 чылдың баштайгы аппарат хуралын бо хүн эрттирдивис. Кол айтырыг чаа-чыл байырлалдарында болгаш дыштаныр хонуктарда кожуун иштинде оперативтиг байдал болган. Ниитизи-биле полицияның, өрт чериниң, эмнелгениң-даа талазындан байдал оожум болганын илеткекчилерден дыңнадывыс. Полицияның ажылдакчылары Хандагайтыга болгаш суму бүрүзүнге шынгыы ажылдаанын үнелеп демдегледим. База көдээ ажыл-агый эргелелиниң специалистери аалдарже үнүүшкүннерни чорудуп, кыштаглаашкыны хынап чорааны эки болган.
Культура-массалыг болгаш спортчу хемчеглер план езугаар болуп эрткен. Өөредилге адыры бичии уругларны хайгааралга ап, школаларга ВДЦ-лерни солун кылдыр эрттирип, дежурстволарны чорудуп турган. Өөредилге эргелелиниң дамчыдып турары-биле 38 оолдар-уруглар малчын аалдарга кышкы дыштанылгазын эрттирген, оларны база хынап барып чораанын дамчытканнар. Учета турар болгаш чедимчези эвээш өг-бүлелерни хүнүң-не хынап, рейдилерни чорудуп турган. Улуг назынныг кижилерни, чаш опеяларны база кадыыныңаайы-биле кызыгаарлыг хамаатыларнын бажыңнарын эмчилер кезээн. Социал адыр талазы-биле эки ажылдаан специалистерни социал политика талазы-биле оралакчы Чодураа Шойдан мактап демдеглээн.
Кожуун иштинге эки байдалды тургузуп, дежурстволарны хүнден-хүнче чорудуп, янзы-бүрү солун хемчеглерни эрттирип ажылдаан удуртукчуларга, коллективтерге четтиргеним илереттим.
Мурнувуста сорулгаларывыс малчыннарның кыштаглаашкыны, одалга сезонунуң ажыл-чорудулгазы, Хандагайты иштинде кудуктарны хайгааралга алыры, чылдың отчедун төндүрери, чагаа-бижиктерге үе-шаанда харыылаары. Оон ангыда бо чылын кожуун иштинге болуп эрттер улуг хемчегеривис база удавас келир Шагаа байырлалывысты шын организастап планнап алыры чугула дээрзин база сагындырдым.
Чаа үнүп келген чылда кадык овур-хевирни тудуп, шын чемненирин сагып, спорт болгаш күш-культура-биле сырый харылзаалыг болурун кижи бүрүзүнге күзээр-дир мен. «Өвүр – кадык овур-хевирниң девискээри» - деп ажылды чорударын сүмеледим.
