Бистиң кожуунга «Бодуңга бүзүре!» - деп социал угланыышкынныг төлевилел келгени дыка солун онза болуушкун болду. Ук төлевилелди удуртуп чоруур хөй-ниити ажыл-чорудукчузу, офтальмолог эмчи, Тыва Республиканың Баштыңының өөнүң ишти - [vk.com/id754594924|Айлана Ховалыг] чаңгыс үзел-бодалдыг кижилерни каттыштырып алгаш, Тыванын шупту булуңнарын кезип, чонувустуң амыдыралын эки талаже өскертиир сорулга-биле, дыка улуг мага-күштү үндүрүп чорууру магаданчыг. Ылаңгыя аныяктарга болгаш өзүп орар ажы-төлүвүске дыка ажыктыг деп санаар дыр мен. Төлевилел оларга бодунуң күжүнге бүзүрелди оттуруп, амыдыралче чаа солун орукту ажыдып, хууда болгаш профессионал өзүлдеге дыка херектиг дириг чижектерниң дузазы-биле болгаш ажыктыг билиглерни шиңгээдип алырынга идигни берип турар. Ужуражылгага келген чонувус аалчыларны чылыг уткуп хулээп ап, дыка сонуургап көргеннер. Ужуражылга үезинде Айлана Чечей-ооловна бистиң кожууннуң шылгараңгай аныяк өг-бүлелерин болгаш идепкейжи өөреникчилерин демдеглеп суй-белектерни тудускан. Оон аңгыда школа бүрүзүнге волейбол четкилерин болгаш волейбол бөмбүктерин белекке берген.
Хүндүлүг Айлана Чечей-ооловна! Силерге Чаа-Хөл кожууннуң ажыл-ишчи чонунуң мурнундан болгаш бодумнуң өмүнээмден, силерниң бердинген ажыл-херээнерге кызыгаар чок экииргек чорууңар болгаш чонуңарга бүзүрелиңер дээш ханы өөрүп четтиргенивисти база катап илередип тур бис. Силерге болгаш чоок кижилериңерге быжыг кадыкшылды, аас-кежикти, эгээртинмес энергияны болгаш ниитилелдиң чаагай чоруу дээш чаа-чаа чедиишкиннерни күзедивис!
Төлевилелдиң киржикчилери:
Куулар Буян Фёдорович - Россияның Маадыры, "Эрес-дидим чорук дээш"-деп орденниң эдилекчизи, ТШО киржикчизи;
Тюлюш Сайын-Белек Михайлович - сумо хүрешке делегей чергелиг спорт мастери, Тыва Республиканың «Чаан мөгези», сумога Европаның дөрт дакпыр чемпиону (2015, 2016, 2017, 2018), сумога делегей чемпионадының хүлер медальының эдилекчизи (2018), сумога Россия чемпиону (2024);
Монгуш Начын Олзеевич - Россияның болгаш Тываның хостуг хүрешке мөгези, 2019 чылда Испанияга юниорлар аразынга Европаның чемпионадының тиилекчизи, Россияның Спорт Мастери (2019), Россияның делегей чергелиг Спорт Мастери (2020). 2025 чылдың апрель 8-те Братиславага хостуг хүрешке Европа чемпионадынга 57 кг чедир деңзиге алдын медальды эдилекчизи;
Папын Маргарита Ондаровна - «Бодуңга бүзүре!» - деп социал төлевилелдиң үндезилекчилериниң бирээзи, Черби суурда школа-интернаттың удуртукчузу, башкы;
Хомушку Субудай Альбертович - балет артизи, бүгү-российжи болгаш делегей чергелиг балет артистериниң мөөрейлериниң лауреады, "Танцевальный Олимп" - деп делегей чергелиг алдын медальдың эдилекчизи, "Саяны" аттыг тыва национал хөгжүм болгаш танцы театырының солизи;
Монгуш Томас Конзай-оолович - салым-чаяанныг аныяк хөгжүмчү болгаш композитор, А.Б. Чыргал-оол аттыг уран-чуул колледжиниң башкызы, Тыва Республиканың композиторларының чогаадыкчы эвилелиниң кежигүнү;
Седии Айдын Сергеевич - Тыва Республиканың алдарлыг артизи, Тыванын национал болгаш күрүнениң симфониктиг оркестириниң хөгжүмчүзү, «Угулза» бөлүүнүң болгаш «Khoomei Beat» - деп этно-фольклорлуг төлевилелиниң киржикчизи болгаш үндезилекчилериниң бирээзи;
Монгуш Артыш Юрьевич - активист, волонтер, «Тываның Буянныг Чүректери» - деп аныяктер шимчээшкининиң удуртукчузу, Тыва Республикада #МыВместе - деп штабтың башкарыкчызы, Добро.рф каттыжыышкынының кежигүнү;
Монгуш Белекмаа Аркадьевна - Тыва Республиканың Баштыңының дузалакчызы;
Соян Орлан Николаевич - Тыва Республиканың өөредилге яамызының сайыдының оралакчызы;
Михайлова Сайлык Револьевна - психолог, психологтуг эртем-шинчилел ажылдарының автору, психология эртемнериниң кандидады;
Хертек Вероника Олеговна - Тыва Республиканың кадык камгалал яамызының штаттан дашкаар кол специализи, Республиканың № 1 эмнелгезиниң гериатрия төвүнүң эргелекчизи.
